Градската библиотека „Браќа Миладиновци“ од Скопје организира разговор со Васко Марковски, авторот на „Урбани легенди“ („Бегемот“), книга на месецот, утревечер во 19 часот во спомен-собата „Т’га за југ“. Ве каниме на незаборавно возење со култниот „Лејланд“ по скопските улици до култните топоси на градот: Кенан, Дестан, Коцка, Зизи, Ван Гог!
-Ве каниме на средба со и средба за култни ликови од градот кои со право го носат епитетот „урбани легенди“. Ве каниме на необичен разговор за Скопје со Васко Марковски – скопјанец, патеписец, раскажувач, колекционер, преведувач, туристички водич и автор на „Урбани легенди“
Разговорот, чиј модератор ќе биде Александра Јуруковска, е дел од вториот циклус на кампањата #ЧитамеСовремениМакедонскиАвтори, а фрагменти од книгата ќе чита актерот Андреј Серафимовски.
Васко Марковски дваесетина години работел како новинар во повеќе медиуми (радио, печат и мултимедија). Во периодот од 2008-2011 бил главен и одговорен уредник на месечникот „Free guide – Macedonia“, а за неговите патеписи е награден со признанието „Најдобар промотор на Македонија“ за 2010 година. Автор е на поетската книга „Корпоративно утро“, на монографијата „Урбани легенди“, збирката репортажи „Непозната Македонија“ и збирката поезија „Скопски улици“. Реализирал изложба на фотографии „Комши камерџик“, од турски на македонски превел повеќе дела, меѓу кои и сто песни од познатиот турски поет Орхан Вели („Риба во шишето ракија“, Антолог, 2014).
